faa-i-laa-tun faa-i-laa-tun faa-i-laa-tun faa-i-laa-tun

mus-taf-i-lun faa-i-lun mus-taf-i-lun faa-i-lun

fa-oo-lun ma-faa-ee-lun faa-oo-lun ma-faa-ee-lun

mu-ta-faa-i-lun mu-ta-faa-i-lun mu-ta-faa-i-lun mu-ta-faa-i-lun

faa-i-lun faa-i-lun faa-i-lun faa-i-lun

ma-faa-ee-lun ma-faa-ee-lun ma-faa-ee-lun ma-faa-ee-lun

faa-i-laa-tun ma-faa-ee-lun ma-faa-ee-lun

faa-i-laa-tun faa-i-lun faa-i-laa-tun faa-i-lun

fa-oo-lun fa-oo-lun fa-oo-lun fa-oo-lun

mus-taf-i-lun faa-i-laa-tun mus-taf-i-lun faa-i-laa-tun (sirf muzaaHif shakl meiN)

ma-faa-ee-lun faa-i-laa-tun ma-faa-ee-lun faa-i-laa-tun (sirf muzaaHif shakl meiN)

mus-taf-i-lun maf-oo-laat mus-taf-i-lun maf-oo-laat (sirf muzaaHif shakl meiN)

ma-faa-i-la-tun ma-faa-i-la-tun ma-faa-i-la-tun ma-faa-i-la-tun (sirf muzaaHif shakl meiN)

ma-faa-ee-lun ma-faa-ee-lun faa-i-laa-tun (sirf muzaaHif shakl meiN)

mus-taf-i-lun mus-taf-i-lun maf-oo-laat (sirf muzaaHif shakl meiN)

faa-i-laa-tun mus-taf-i-lun faa-i-laa-tun (sirf muzaaHif shakl meiN)

faa-i-laa-tun faa-i-laa-tun mus-taf-ilun (sirf muzaaHif shakl meiN)

maf-oo-laat mus-taf-i-lun maf-oo-laat mus-taf-i-lun (sirf muzaaHif shakl meiN)

2.4: talaffuz aur taqtee'
usool.e.taqtee' ke mutaabiq alfaaz jis taraH paRhe jaate haiN usee taraH un kee taqtee' bhee kee jaatee hai. is liye ash'aar kee taqtee' ke liye alfaaz ke imlaa kee rehnumaa'ee her maqaam per durust aur mo'tabar naheeN hai. maslan : ham 'KHooshee' (Khe, vav, sheen, ChhoTee ye) likhte haiN lekin 'Khushee' (jaise Khe per pesh ho aur vav Ghaa’ib ho) paRhte haiN. yehee doosraa talaffuz taqtee' meiN istaimaal kiyaa jaayegaa. kon saa lafz kab ChhoTaa yaa baRaa kar ke paRhaa jaaye?: is kee tafseel kaa yeh moqa' naheeN hai. agar shaa'ir zoq.e.saleem rakhtaa hai aur shaa'iree ke zer.o.bam (rhythm) se vaaqif hai to baGhair talaffuz aur taqtee' ke saare usool paRhe voh taqreeban hamesha apne kalaam ko saaf suthraa aur taqtee' ke liHaaz se saHeeH banaa saktaa hai.

kuChh Huroof taqtee' meiN naheeN liye jaate haiN. in se thoRee see vaaqifiyyat honee chaahiye taa.k apnee Ghalatee Khud hee saHeeH karne meiN aasaanee ho.

darj.e.zail aavaazeN taqtee' meiN naheeN lee jaatee haiN :

(1) do.chashmee 'hey' agar voh lafz ke beech mein yaa aaKhir meiN aaye, maslan : paRhnaa, doodh vaGhira.

(2) noon.e.Ghunna (nasal 'noon') chaahe voh lafz ke beech meiN ho yaa aaKhir meiN.

(3) voh 'vav' jo paRhne meiN naheeN aataa hai maslan : Khush, Khwaab vaGhaira.

(4) yaa.e.maKhloot (ya'nee voh 'ye' jo lafz meiN khap kar apnaa alag vujood taqreeban kho de) maslan : kyoN, kyaa vaGhaira.

(5) agar teen (3) saakin Huroof (ya'nee voh Huroof jin ko bolne meiN Harkat naheeN denee paRtee hai) aik saath aa.jaayeN to aaKhir saakin lafz taqtee' meiN nazar.andaaz kiyaa jaa saktaa hai, maslan : zeest ke teen Huroof ( ye, seen, te) saakin haiN, chunaanche 'te' ko taqtee' meiN nazar.andaaz karnaa durust ho gaa.

(6) misre ke aaKhir mein jo saakin lafz akelaa bach jaaye usko taqtee' meiN nazar andaaz kar dete haiN. maslan aik misra hai:

gulshan meiN band.o.bast ba.raNg.e.digar hai aaj

is misre kee aaKhiree 'jeem' saakin hai aur taqtee' meiN naheeN lee jaayegee.

2.5: chaNd vazaaHateN

ab baat us manzil per aa gayee hai k baGhair vazaaHatee imsaal (sing: misaal) aur un per tafseelee guftugoo ke matlab samjhaanaa taqreeban naa.mumkin hogaa. aa’inda in safHaat meiN jo masaa'il pesh kiye jaayeNge un ke baare meiN chand umoor bayaan karnaa zarooree ma'loom hotaa hai.

(1) muKhtalif beHroN kee jo misaaleN pesh kee jaayeNgee un kaa naqsha yooN hogaa:

(a) beHr kaa bayaan chooN.k pehle ho chukaa hai is liye yahaaN sirf us kee jaanib muKhtasar ishaara kiyaa jaayegaa. agar zarooree huaa to us ke ziHaafaat banaane kaa tareeqa aur un ziHaafaat kaa naam diyaa jaayega aur misaal ke liye diye sher meiN un kee pehchaan bataayee jaayegee.

(b) misaal ke sher kee taqtee kee jaayegee aur us ke voh pehloo muKhtasar taur per bataa diye jaayeNge jo ba.yak nazar zaahir naheeN haiN.

(2) sirf voh beHreN bayaan hoNgee jo ziyaada musta'mil haiN. zaahir hai k her beHr kaa bayaan na to mumkin hai aur na hee zarooree.

(3) meree naa.cheez raa'e meiN aap aage kee beHs se ziyaadah faa'ida uThaa sakte haiN agar her beHr per ruk kar us kee taqtee' kaa gehraa tajziyah kareN aur yeh dekheN k kis taraH misre ke tukRoN kee lambaa'ee aur adaa'igee kaa taal.mail arkaan ke saath kiyaa gayaa hai. agar aap misra aur us kee taqtee' bulaNd aavaaz se ruk ruk kar adaa kareN to shaayad is saare amal ko samajhne meiN aasaanee hogee.

(4) shaa'iree aur taqtee' aik fun (art) hai, 'science' naheeN hai! lihaaza is meiN kaheeN kaheeN chand usooloN ke teHt kuChh aazaadee bartee jaa saktee hai. reh gaye voh usool jo is fun meiN mustasniyaat (exceptions) ko qaabil.e.qubool banaate haiN to voh hamesha se barte jaa rahe haiN. asaatiza ne sadiyoN isee aNdaaz se kaam kiyaa hai. is liye ab hamaaraa in per e'tiraaz karnaa bekaar hai. behtar hai k in ko qubool kar ke ham ilm Haasil kareN. yeh dekhaa gayaa hai k jin logoN ne in usooloN ko toRaa hai voh apnee shaa'iree kee lataafat aur Husn meiN se bohat kuChh kho beThe haiN.

(5) yeh saaree beHs aur Khaas taur se beHr aur un ke ziHaafaat ziyaadah saaf taur se us vaqt samajhe jaa sakte haiN jab in ko Urdu meiN likh liyaa jaaye aur phir in per Ghaur kiyaa jaaye. yeh is liye zarooree hai k Roman Urdu meiN :transliterate: karte hue voh kuChh istaimaal karnaa hotaa hai jo Urdu meiN mojood naheeN hai. phir Urdu ke zer, zabar aur pesh likhe to naheeN jaate haiN lekin paRhe to jaate haiN aur in kee aavaazoN ko Roman meiN likhnaa zarooree hai. is se mushkil pedaa hotee hai. aap kee sahoolat ke liye isee liye is se qabl tamaam arkaan ke Huroof.e.tahajjee likh diye gaye the. un ko dekh leejiye.

2.6: beHr.e.rajaz

is beHr ke afaa'eel (arkaan) yooN haiN:

mus-taf-i-lun mus-taf-i-lun mus-taf-i-lun mus-taf-i-lun

Urdu shaa'iree meiN is kee saalim aur muzaaHif donoN shakleN istaimaal hotee haiN. donoN sooratoN kee aik aik misaal neeche dee jaa rahee hai.

2.6.1: beHr.e.rajaz, musamman, saalim : ya'nee beHr.e.rajaz kee voh shakl jis meiN saalim arkaan apnee musamman (aaTH-ruknee) soorat meiN istaimaal kiye gaye haiN, goyaa her misre meiN to chaar hee arkaan haiN lekin sher ke donoN misroN ko milaa kar kul aaTh arkaan gine jaa sakte haiN. Mir Taqi Mir kaa sher aur us kee taqtee' dekhiye:
ae mujh se tujh ko sau mile tujh saa na paayaa aik maiN
sau sau kaheeN too ne magar muNh per na laayaa aik maiN

mus-taf-i-lun mus-taf-i-lun mus-taf-i-lun mus-taf-i-lun

ae mujh se tujh ko sau mile tujh saa na paa yaa aik maiN

sau sau kaheeN too ne magar muNh per na laa yaa aik maiN

2.6.2: beHr.e.rajaz, musamman, mutawee, maKhboon : ya'nee beHr.e.rajaz kee voh musamman shakl jis meiN do (2) taraH ke ziHaaf istaimaal kiye gaye haiN. yeh ziHaaf un tareeqoN se Haasil kiye gaye haiN jin ko bil.tarteeb :tai: aur :Khaban: kehte haiN. in kaa muKhtasar bayaan neeche diyaa jaa rahaa hai.

tai (toe, baRee ye): mus-taf-i-lun meiN se Harf :fe: nikaal deN to :mus-ta-i-lun: bach jaataa hai jis ko :muf-ta-i-lun: se badal dete haiN goyaa :muf-ta-i-lun: mutawee (amal.e.:tai: se banaayaa gayaa) ziHaaf hai :mus-taf-i-lun: kaa.Khaban: mus-taf-i-lun meiN se Harf :seen: nikaal deejiye to :mu.taf.i.lun: reh jaataa hai. is ko :mu-faa-i-lun: banaa dete haiN goyaa yeh :mus-taf-i-lun: kaa :maKhbooN: ziHaaf hai.

ab dekhiye yeh donoN ziHaafaatt neeche taqtee' meiN isee tarteeb se kaise aa'te haiN:

Ghuncha.e.naa.shagufta ko door se mat dikhaa k yooN
bosey ko pooChhtaa hooN maiN muNh se mujhe bataa k yooN (Ghalib)

muf-ta-i-lun mu-faa-i-lun muf-ta-i-lun mu-faa-i-lun

Ghuncha.e.naa shagufta ko door se mat dikhaa k yooN

bosey ko poo Chhtaa hooN main muNh se mujhe bataa k yooN

Note: yeh beHr shakasta hai kyoN.k is meiN pehle do (2) arkaan kee takraar hai. yeh zikr pehle ho chukaa hai.

2.7: beHr.e.ramal : is beHr kee donoN shakleN (musaddas aur musamman) Urdu meiN istaimaal hotee haiN. is ke arkaan yooN haiN:

faa-i-laa-tun faa-i-laa-tun faa-i-laa-tun faa-i-laa-tun

is beHr ke ziHaafaat banaane kee soorateN darj.e.zail haiN:

(a) Hazaf : faa-i-laa-tun ka :tun: nikaal deejiye to :faa-i-laa: bachtaa hai jis ko :faa-i-lun: se badal dete haiN aur is ko :meHzoof: kehte haiN.

(b) shakl : faa-i-laa-tun kaa pehlaa :alif: aur :noon: nikaal deN to :fa-i-laat: bach rehtaa hai. is ziHaaf ko :faa-i-laa-tun: kee :mashkool: shakl kehte haiN.

(c) Khaban : faa-i-laa-tun kaa pehlaa :alif: nikaal deN to :fa-i-laa-tun: reh jaataa hai jo :faa-i-laa-tun: kaa maKhbooN ziHaaf kehlaataa hai.

(d) qata' : ooper (a) meiN faa-i-lun aik meHzoof shakl hai. is meiN se Harf :noon: nikaal deejiye aur aaKhiree Harf :laam: ko saakin kar deejiye to yeh amal :qata': kehlaataa hai. rukn :faa-i-l: ko :fa'-lun: se badal dete haiN aur us ko :maqtoo': (meem, qaaf, toe, vav, ain) kehte haiN. ab in shakloN kee misaaleN aur taqtee' dekhiye. yeh yaad rakhiye k (d) dar. asl (c) ke aNdar shaamil hai!

2.7.1: beHr.e.ramal, musamman, meHzoof : ya'nee voh beHr.e.ramal jis meiN aaTh arkaan haiN aur jis meiN meHzoof ziHaaf (faa-i-lun) istaimaal kiyaa gayaa hai:

naqsh faryaadee hai kis kee shoKhee.e.teHreer kaa
kaaGhazee hai perhan her pekar.e.tasveer kaa (Ghalib)

faa-i-laa-tun faa-i-laa-tun faa-i-laa-tun faa-i-lun

naqsh faryaa dee hai kis kee shoKhee.e.teH reer kaa

kaaGhazee hai perhan her pekar.e.tas veer kaa

2.7.2: beHr.e.ramal, musamman, mashkool : ya'nee beHr.e.ramal kee voh aaTh-ruknee shakl jis meiN mashkool ziHaaf (fa-i-laat) istaimaal kiyaa gayaa hai:

yeh na thee hamaaree qismat k visaal.e.yaar hotaa
agar aur jeete rehte yehee intizaar hotaa (Ghalib)

fa-i-laat faa-i-laa-tun fa-i-laat faa-i-laa-tun

yeh na thee ha maaree qismat k visaal.e yaar hotaa

agar aur jeete rehte yehee inti zaar hotaa

Note: yeh beHr shakastah hai.

2.7.3: beHr.e.ramal, musamman, maKhboon, meHzoof, maqtoo' : ya'nee beHr.e.ramal kee voh aaTh-ruknee shakl jis meiN, bil.tarteeb, :faa-i-laa-tun: ke maKhboon, meHzoof-maqtoo' ziHaafaat istaimaal kiye gaye haiN:

nafas.e.Qais k hai chashm.o.chiraaGh.e.seHraa
na sahee shama.e.siyah.Khaana.e.Lailaa na sahee (Ghalib)

fa-i-laa-tun fa'-laa-tun fa'-laa-tun fa'-lun

nafas.e.Qai s k hai chash m.o.chiraaGha.e seHraa

na sahee shama .e siyah.Khaa na.e.Lailaa na sahee

dekhiye k donoN misroN kaa pehlaa rukn :fa-i-laa-tun: hai :faa-i-laa-tun: naheeN hai. is beHr meiN is kee ijaazat hai. doosraa aur teesraa rukn :fa'-laa-tun: hai aur aaKhiree meHzoof-maqtoo' ya'nee :fa'-lun: hai.

2.7.4: beHr.e.ramal, musaddas, meHzoof : ya'nee beHr.e.ramal kee voh Chhe-ruknee shakl jis meiN us kaa meHzoof ziHaaf (faa-i-lun) istaimaal huaa hai. dekhiye k her misre meiN teen arkaan haiN lekin donoN misroN ko milaa kar Chhe (6) ho jaate haiN aur isee liye is ko :musaddas: (Chhee-ruknee) kahaa jaataa hai:

haiN kavaakib kuChh nazar aate haiN kuChh
detey haiN dhokaa yeh baazee.gar khulaa (Ghalib)

faa-i-laa-tun faa-i-laa-tun faa-i-lun
haiN kavaakib kuChh nazar aa te haiN kuChh

detey haiN dho kaa yeh baazee gar khulaa

2.7.5: beHr.e.ramal, musaddas, maKhboon, meHzoof : ya'nee beHr.e.ramal ke voh Chhe-ruknee shakl jis meiN maKhboon (faa-i-laa-tun kee maKhboon shakl fa-i-laa-tun) aur meHzoof (faa-i-laa-tun kee meHzoof shakl fa-i-lun) ziHaafaat istaimaal kiye gaye haiN:

ishq mujh ko naheeN veHshat hee sahee
meree veHshat tiree shohrat hee sahee (Ghalib)

faa-i-laa-tun fa-i-laa-tun fa-i-lun

ishq mujh ko naheeN veHshat hee sahee

meree veHshat tiree shohrat hee sahee

2.8: beHr.e.Khafeef : Urdu mein yeh beHr sirf musaddas shakl meiN hee istaimaal hotee hai. yeh apnee musamman shakl meiN kabhee istaimaal naheeN hotee hai aur na hee saalim aatee hai, ya'nee is kee sirf muzaaHif shakleN hee musta'mil haiN. is beHr ke saalim arkaan yooN haiN:

faa-i-laa-tun mus-taf-i-lun faa-i-laa-tun
apnee muzaaHif shakloN meiN is kaa pehlaa rukn fa-i-laa-tun aur aaKhiree rukn fa-i-lun ho saktaa hai. aap ko yaad ho gaa k :mus-taf-i-lun: kee maKhboon shakl :fa-i-laa-tun: hai aur :fa'-l-un: usee kee maqtoo' shakl hai. is beHr kee do muzaaHif shakleN neeche dee jaa rahee haiN:

2.8.1: is misaal meiN pehle misre meiN :fa-il-aa-tun: aur doosre misre meiN :faa-i-laa-tun: istaimaal hue haiN. is kee vajh misroN meiN :dil: aur :aaKhir: ke talaffuz kaa farq hai:

dil.e.naadaaN tujhe huaa kyaa hai
aaKhir si dard kee davaa kyaa hai (Ghalib)

fa-i-laa-tun mu-faa-i-lun fa-i-lun

dil.e.naadaaN tujhe huaa kyaa hai

faa-i-laa-tun mu-faa-i-lun fa-i-lun

aaKhir is dar d kee davaa kyaa hai

2.8.2: doosree misaal meiN aik misre kaa aaKhiree rukn :fa'-lun: hai aur doosre kaa :fa-i-lun: hai:

kyaa voh Namrood kee Khudaa'ee thee
baNdigee meiN miraa bhalaa na huaa (Ghalib)

faa-i-laa-tun mu-faa-i-lun fa'-lun

kyaa voh Namroo d kee Khudaa ee thee

faa-i-laa-tun mu-faa-i-lun fa-i-lun

baNdigee meiN miraa bhalaa na huaa

2.9: beHr.e.kaamil : yeh beHr hamaare yahaaN umooman :musamman, saalim: (ya'nee apnee aaTh.ruknee shakl meiN saalim arkaan ke saath) ziyaadah maqbool hai. is kee :musaddas, saalim: (ya'nee Chhe ruknee shakl, saalim afaa'eel ke saath) bhee kabhee kabhee nazar aa.jaatee hai, lekin yeh soorat ziyaadah maqbool naheen hai. is beHr kee musamman, saalim shakl ke arkaan aur is kee aik misaal darj.e.zail haiN:

kabhee ae Haqeeqat.e.muntazir nazar aa libaas.e.majaaz meiN
k hazaaroN sajde taRap rahe haiN miree jabeen.e.niyaaz meiN (Iqbal)

mu-ta-faa-i-lun mu-ta-faa-i-lun mu-ta-faa-i-lun mu-ta-faa-i-lun

kabhee ae Haqee qat.e muntazir nazar aa libaa s.e majaaz meiN

k hazaaroN saj de taRap rahe haiN miree jabee n.e niyaaz meiN

2.10: beHr.e.muta'qaarib : yeh Urdu kee bohat maqbool beHroN meiN se aik hai. is beHr ke arkaan darj.e.zail haiN:

fa-oo-lun fa-oo-lun fa-oo-lun fa-oo-lun

yeh beHr umooman musamman (aaTh-ruknee) hee istaimaal hotee hai aur is kee musaddas (Chhe ruknee) shakl kam nazar aatee hai. is kee muKhtalif shakleN neeche dee jaa rahee haiN:

2.10.1: beHr.e.muta,qaarib, musamman, saalim : ya'nee beHr.e.muta,qaarib kee voh aaTh.ruknee shakl jis meiN sirf saalim arkaan istaimaal kiye gaye haiN.

voh nabiyoN meiN reHmat laqab paane vaalaa
muraadeN GhareeboN kee bar laane vaalaa (Hali)

is sher kee taqtee' yooN hai:

fa-oo-lun fa-oo-lun fa-oo-lun fa-oo-lun

voh nabiyoN meiN reHmat laqab paa ne vaalaa

muraadeN GhareeboN kee bar laa ne vaalaa

2.10.2: beHr.e.muta’qaarib, musamman, meHzoof : ya'nee is beHr kee voh aaTh ruknee shakl jis meiN is ke meHzoof ziHaaf istaimaal kiye gaye haiN. Hazaf kaa amal voh hai jis ke zari'e :fa-oo-lun: se :lun: nikaal diyaa jaataa hai aur bache hue Hisse :fa.oo: ko :fa-al: se badal diyaa jaataa hai. dekhiye ke neeche taqtee' meiN kis taraH yeh ziHaaf aayaa hai:

gayaa daur.e.sarmaaya.daaree gayaa
tamaasha dikhaa kar madaaree gayaa (Iqbal)

fa-oo-lun fa-oo-lun fa-oo-lun fa-al

gayaa dau r.e sarmaa ya daaree gayaa

tamaasha dikhaa kar madaaree gayaa
2.10.3: beHr.e.mutaqaarib, musamman, maqbooz, aslam, mudaa'if : ya'nee is beHr kee voh aaTh ruknee shakl jis meiN :fa-oo-lun: ke :maqbooz aur aslam: ziHaafaat is taraH istaimaal hote haiN k un kee ta'daad do.gunee kar dee jaatee hai. in ziHaafaat kee soorat yooN hai:

maqbooz: agar :fa-oo-lun: meiN se Harf :noon: nikaal deN to :fa-oo-l: reh jaataa hai jo :fa-oo-lun: kaa :maqbooz: ziHaaf kehlaataa hai.

aslam: agar :fa-oo-lun: meiN se sirf :fe: nikaal deN to :oo-lun: reh jaataa hai jis ko :fa-lun: se badal dete haiN aur yehee :aslam: ziHaaf hai.
neeche ke sher meiN yeh ziHaafaat isee tarteeb se aayeN.ge aur her misr meiN arkaan kee ta'daad aaTh hogee goyaa poore sher meiN sola (16) arkaan hoNge:

maiN zulmat.e.shab meiN le ke niklooN.gaa apne dar.maaNda kaarvaaN ko sharar.fishaaN hogee aah meree, nafas nafas sho'la.baar hogaa (Iqbal)
(1) maiN zulma t.e sahab meiN le ke niklooN

fa-ool fa-lun fa-ool fa-lun

gaa apne darmaaN da kaar vaaN ko

(2) ) sharar fi shaaN ho gee aah meree

fa-ool fa-lun fa-ool fa-lun

nafas na fas sho' la.baar hogaa

2.10.4: beHr.e.muta’qaarib, musaddas, maqbooz, aslam , mudaa'if : ya'nee is beHr kee voh Chhe.ruknee shakl jis meiN :maqbooz aur aslam: ziHaafaat isee tarteeb se lekin apnee do.gunee ta'daad meiN istaimaal kiye gaye haiN. in ziHaafaat ke banaane kee tafseel yooN hai:

(1) qabz: agar :fa-oo-lun: kee :noon: nikaal deN to jo bach jaataa hai ya'nee :fa-ool: is ko :fa-oo-lun: kaa maqbooz ziHaaf kehte haiN.

(2) agar :fa-oo-lun: kee :fey: nikaal deN to :oo-lun: bachtaa hai jis ko badal kar :fa-lun: kar diyaa jaataa hai. yeh amal :salam: aur yeh shakl :fa-oo-lun: kaa aslam ziHaaf kehlaatee hai.

neeche kee misaal meiN yeh ziHaafaat isee tarteeb se aaye haiN aur un kee taa'daad ko do.gunaa bhee kar diyaa gayaa hai. yeh beHr kee musaddas shakl hai chunaan.che her misre meiN Chhe (6) arkaan hoN.ge aur poore sher meiN baara (12).

Khumaar.e.mei meiN voh chehra kuChh aur lag rahaa thaa
dam.e.seHar jab Khumaar utraa to maiN ne dekhaa (Munir Niyazi)

fa-ool fa-lun fa-ool fa-lun fa-ool fa-lun
Kumaar.e mei meiN voh chehra kuChh au r lag ra haa thaa

dam.e.se Har jab Khumar utraa to maiN ne dekhaa

2.10.5: beHr.e.muta’qaarib, musamman, aslam : ya'nee is beHr kee voh aaTh ruknee shakl jis meiN is kaa :aslam: ziHaaf (fa-lun) istaimaal kiyaa gayaa hai.

ney muhra baaqee, ney muhra.baazee
jeetaa hai Rumi, haaraa hai Razi (Iqbal)

fa-lun fa-oo-lun fa-lun fa-oo-lun

ney muh ra baaqee neh muh ra baazee

jeetaa hai Rumee haaraa hai Razi
=======================================================================

The copyright of the contents of these articles belongs to the writer. The articles or parts thereof may not be copied, quoted or used otherwise without prior consent of the writer.